Средба Заев – АТА: Сега е моментот за влез на Македонија во НАТО

147

Премиерот Зоран Заев денеска имаше средба со проф. Фабрицио В. Лучиоли, претседател на Светската Атлантска Асоцијација (АТА) и делегација на Евро-Атлантскиот Совет на Македонија (АТА Македонија) предводена од претседателот Исмет Рамадани.

На средбата присуствуваше и Стево Пендаровски, национален координатор за подготовка на Македонија за членство во НАТО и државниот секретар во Министерството за одбрана, Драган Николиќ.

Како што соопшти владината прес-служба, претставникот на АТА, Лучиоли во разговорот со премиерот Заев, заблагодарувајќи се на гостопримството, потенцираше дека во Македонија е дојден да ја изрази поддршката и порача дека Македонија заслужува да биде дел од евро-атлантските структури.

Лучиоли, кој е експерт за безбедност, рече дека НАТО има потреба од нова енергија и порача дека е потребно Република Македонија да остане посветена да го одржи континуитетот на процесите кои веќе една година забрзано ги исполнува. Тој го истакнал придонесот на Македонија во операциите, мисиите, предводени од НАТО, оценувајќи ги како важен дел за безбедноста на државата, за регионот и пошироко.

Премиерот Заев, честитајќи го Денот на НАТО, кој денеска се одбележува со повеќе активности во државата, ги информираше гостите дека Владата со поддршка на граѓаните и меѓународните партнери го трасира и не отстапува од патот за интеграција на Република Македонија во Северно-атлантската алијанса и ЕУ.

Истакнувајќи, дека над 75 проценти од граѓаните на Република Македонија посакуваат членство во ЕУ и НАТО, како што се наведува, премиерот Заев се заблагодарил за севкупната поддршка која ја прават особено организациите како АТА, кои не се политички организации, но вршат ширење на идејата за зајакнување на безбедноста на сите држави на континентот, со посебен акцент на јакнење на пријателските односи со соседите.

– Овој период е вистински момент, кој треба да го искористиме за што побрзо влегување во НАТО, како 30-та членка и ние сериозно се надеваме на тоа – рече Заев.

Во таа насока, премиерот истакнал дека исполнувањето на Планот 3-6-9 за спроведување на итните реформски приоритети, во судството, медиумите, борбата против корупцијата, во јавната администрација, како и во изборното законодавство, се важни за резултатите во евроинтеграциите, но истовремено се значајни и за влез во НАТО.

– Владата е свесна за значењето на реформите кои што отвораат пат кон НАТО и ЕУ, но со тоа и ги отвораат и можностите за квалитетен живот на граѓаните. Стратешките цели на Македонија се членство во Северно-атлантската алијанса и Европската Унија и охрабрувањата многу ни значат – рече Заев.

На средбата премиерот, како што се наведува, информирал и за актуелниот политички момент во земјата и ја потенцирал заложбата на Владата да го поттикне дијалогот и соработката на опозицијата, особено во делот на обезбедување на функционална работа на Собранието, со цел исполнување на исклучително важните реформи во однос на аспирациите на Македонија за членство во НАТО и ЕУ.

 

Преземањето на оваа содржина или на делови од неа без непосреден договор со редакцијата на Плусинфо значи експлицитно прифаќање на условите за преземање, кои се објавени тука.