• 21 ноември 2017
  • Вести денес: 83

Добро е. Вака или онака, премиерот Зоран Заев покажа дека трпи критика. Барем јавно. А што му трпи душата, само он си знае. На јавната сцена, човекот е транспарентен, отворен и директен. Тоа го покажа и на дебатата за буџетот на МТВ, која ме предизвика, по долго време, да го пофалам јавниот сервис.

Се согласувам со професорот Ѓорги Спасов кога нѐ кара и вели дека е малку престрого да се кажува дека ова од Владата, сега-засега, е малку и дека можеби не биле реални очекувањата. И во право е кога вели дека се отворени многу сериозни процеси на промени во Македонија кои заслужуваат поддршка, иако заборава да каже дека за тие сериозни процеси Владата доби исто толку сериозна поддршка од медиумите. Од оние што се важат.

Сепак, професорот греши во неговата насловна теза – лесно е да се критикува Заев, вели тој. Не, верувајте, воопшто не е лесно. Еве зошто.

Прво, не е лесно, зашто сега знаеме дека работите нема да одат така лесно како што се очекуваше и најавуваше. Но, лесно ветената брзина сепак не е наша вина.

Второ, не е лесно, зашто Заев и неговата влада немаат баш уверливи одговори зошто се одложуваат некои реформи за кои не смее да има одлагање. Во ред, решила Владата да не ја крати администрацијата. Не ми се допаѓа, ама тоа е, политичка одлука. Но, ние знаеме дека во тој сектор има огромни резерви за внатрешни рационализации, за чиновништвото да стане попродуктивно. За тоа сведочат дури и самите министри. Агилната и искрена министерка за труд и социјала Мила Царовска, за своето министерство вели дека „е преоптоварено со кадар, но долу во сервисите - дневни центри за лица со пречки, центри за социјална работа што треба да им служат на граѓаните, таму нема вработени“. Ако е така, ајде веднаш претумбации. Што се чека?

Трето, не е лесно да се критикува владата на Заев, зашто навистина има многу луѓе во неговото опкружување кои се обидуваат да сузбијат секаква јавна критика, нарекувајќи ја критицизам, омилен термин од златните комуњарски времиња, или „мрчење“, простачки синоним од вокабуларот на куртон-порталите и останатите ФБ-апологети, кои дури почнаа самите себе да се саморекламираат како „провладини“.

Конечно, не е лесно, зашто повеќето од нас што деновиве критички ја опсервираме работата на Владата, сепак настапуваме од позиции на „другарска критика“ (еве уште еден познат комуњарски термин), а остатоците од груевистичката пропаганда, во тој тон, што Јанко бурекчијата го нарече „лакејски“, препознаваат некакво „разочарување“, неостварени лични очекувања и амбиции на критичарите и слични будалштини.

Нејсе, тука помош нема. Ни отстапки. Ние си избравме и си поддржуваме демократска влада и како таква ќе ја третираме – а тоа значи и дека ќе ја критикуваме! – сѐ додека таа не го докаже спротивно. Наречете го тоа презумпција на демократичност ако сакате. Тоа е.

ПС. Во наредните неколку денови нема да ги читате моите острилки. За да не помисли некој нешто лошо, ете, да ве известам дека заминувам на едно кратко приватно патување, со јасна намера опасно да се збунам и целосно да се дефоксуирам од настаните во Македонија. Ако смеат пратениците, зошто да не смеам јас?
 

ОСТАНАТО ОД КОЛУМНИ

Преиспитување и ново саморазбирање

Големо парче од Републиката каква што ја познававме е изедено во поместувањата на тие геополитички пластови, таму е или празнина или нефункционална содржина или болна содржина и тие дупки мораме да ги пополниме со модерност, со здрав резон.

Македонија на кошаркарското ЕП 2021!

Благоја Георгиевски по неуспехот во квалификациите за ЕП 2017 поднел оставка, но побарал и Наумовски да го направи истото! Како Македонец и љубител на спортот во истовреме тагувам поради сегашната наша европска кошаркарска провинцијалност.

Врзете се, полетуваме!

Македонија стана земја со најголема стапка на дебата за реформи по глава на жител во Европа! Што си баравме – тоа си добивме: сите фатиле да дискутираат, да дебатираат, да полемизираат, да се допишуваат и да се надвикуваат!

Новогодишни прослави на плоштадите – да или не?!

Ако ја сакаме и почитуваме македонската музика и продукција, да го покажеме тоа на дело, а нашите естрадни ѕвезди да покажат доблест дека се отворени за една таква нова соработка во која нема да се преценат.

Грујо, добри гости ти дојдоа - Убиство со песна

Важно е! Навистина е бесценето важно, да не го заборавиме злото на владеењето на ВМРО – ДПМНЕ и сите негови лица, за да не дозволиме да ни се повтори.

Земја на (не)реваншизмот

И кога сè така убаво ќе изрелативизираме, па ќе го завиткаме во нереваншистичка обланда и обилна доза на шлаг, тогаш на врвот пак ќе се појави она фирерчено и неговите ора, стапот со два краја и слични идиотштини.

Политичарите и политиците пред историчарите и лингвистите

Можно ли е да изградиме наративи за историјата во духот на добрососедството на Македонија и Бугарија? Да, но само под еден услов – таа работа сепак да им ја оставиме на политичарите.

Братучед му на Мугабе

Бидејќи сме во Европа – а и заради милион други причини – планот на Грујо излезе пократок за дваесетина години од оној на Мугабе, кој со Зимбабве владееше од 1987 година.

Пратениците и нивните патни трошоци

Доколку успеат да се ослободат од хипотеката околу трошоците за превоз, пратениците во Собранието ќе имаат можност да покренат многу прашања околу трошењето на народните пари, вклучително и во македонските ДКП!

Нихилизмот не е доблест

Бугарија беше во друштвото на тие 13 фашистички држави и во врска со тоа спор нема, напиша бугарскиот хроничар Стефан Цанев.

НАЈЧИТАНИ